لالہ و گل ہیں چاند تارے ہیں

لالہ و گل ہیں چاند تارے ہیں

آپ کے نقش سب سے پیارے ہیں

دل ہے میرا حریف قوس قزح

رنگ اس آئینے میں سارے ہیں

حاصل زندگی ہیں وہ لمحے

جو ترے عشق میں گزارے ہیں

آنسوؤں کو ملا نہ مٹی میں

یہ محبت کے شاہ پارے ہیں

آپ کا جب سے التفات نہیں

بار نظروں پہ سب نظارے ہیں

جانے کس گھاٹ جا کے اترے گی

ناؤ کے ہم سفر کنارے ہیں

اک محبت ہزار افسانے

ایک دل سینکڑوں سہارے ہیں

ان کی ہر جنبش نظر میں طفیلؔ

کچھ کنائے کچھ استعارے ہیں