lala-o-gul ka jahan ras kab aaya hai mujhe

lāla-o-gul kā jahāñ raas kab aayā hai mujhe

in nazāroñ ne bahut ḳhuun rulāyā hai mujhe

vaqt ne jab koī ā.īna dikhāyā hai mujhe

kyā bhayānak mirā chehra nazar aayā hai mujhe

talḳhī-e-marg rag-o-pai meñ utartī jaa.e

zindagī tū ne ye kyā zahr pilāyā hai mujhe

chalte chalte yūñhī thak kar kahīñ so jā.ūñgā

dasht-e-ġhurbat kī kaḌī dhuup hī saayā hai mujhe

zindagī ne mirī dam saadh liyā hai jaise

jab tirī yaad meñ khoyā huā paayā hai mujhe

ufuq-e-dil pe nazar aatī hai kho jaatī hai

ek parchhā.īñ ne dīvāna banāyā hai mujhe

ghar se niklā huuñ to ab pūchh rahā huuñ ḳhud se

jā rahā huuñ maiñ kahāñ kis ne bulāyā hai mujhe

koī hogā jo mirī raah takegā shāyad

ik yahī vahm yahāñ khīñch ke laayā hai mujhe

sirf ik ḳhvāb thā maiñ apne zamāne ke liye

jis ne paayā hai mujhe us ne gañvāyā hai mujhe

do sitāroñ kī mulāqāt kā vahshī naġhma

be-sadā raat ne phir aaj sunāyā hai mujhe

ḳhvāb us ke kabhī ho jaa.eñ na vīrāñ 'maḳhmūr'

us ne kyoñ apne ḳhayāloñ meñ basāyā hai mujhe

lala-o-gul ka jahan ras kab aaya hai mujhe

in nazaron ne bahut KHun rulaya hai mujhe

waqt ne jab koi aaina dikhaya hai mujhe

kya bhayanak mera chehra nazar aaya hai mujhe

talKHi-e-marg rag-o-pai mein utarti jae

zindagi tu ne ye kya zahr pilaya hai mujhe

chalte chalte yunhi thak kar kahin so jaunga

dasht-e-ghurbat ki kaDi dhup hi saya hai mujhe

zindagi ne meri dam sadh liya hai jaise

jab teri yaad mein khoya hua paya hai mujhe

ufuq-e-dil pe nazar aati hai kho jati hai

ek parchhain ne diwana banaya hai mujhe

ghar se nikla hun to ab puchh raha hun KHud se

ja raha hun main kahan kis ne bulaya hai mujhe

koi hoga jo meri rah takega shayad

ek yahi wahm yahan khinch ke laya hai mujhe

sirf ek KHwab tha main apne zamane ke liye

jis ne paya hai mujhe us ne ganwaya hai mujhe

do sitaron ki mulaqat ka wahshi naghma

be-sada raat ne phir aaj sunaya hai mujhe

KHwab us ke kabhi ho jaen na viran 'maKHmur'

us ne kyon apne KHayalon mein basaya hai mujhe