lala-o-gul ka lahu lakh bahaya jae

lāla-o-gul kā lahū laakh bahāyā jaa.e

ye chaman chhoḌ ke ham se to na jaayā jaa.e

phir rahe haiñ sabhī chehroñ pe naqābeñ Daale

kis ko hālāt kā ā.īna dikhāyā jaa.e

rang par jashn-e-bahārāñ jabhī aa saktā hai

phuul kāñToñ meñ koī farq na paayā jaa.e

apnī tahzīb hī iḳhlās-o-ravādārī hai

is ko haTne se ba-har-hāl bachāyā jaa.e

sab barābar ke haiñ haqdār chaman-sāzī meñ

phir kise harf-e-ġhalat kah ke miTāyā jaa.e

ḳhud-baḳhud qaum kī taqdīr sañvar jā.egī

pahle bigḌā huā māhaul banāyā jaa.e

jī rahe haiñ sabhī ehsās kuchal kar apnā

ab kise dard kā ehsās dilāyā jaa.e

sirf ham uTh ga.e uupar to koī shaan nahīñ

shaan to ye hai ki girtoñ ko uThāyā jaa.e

ḳhuun bastā hai tamannāoñ kā āñkheñ kyā haiñ

kaun sā ḳhvāb nigāhoñ meñ basāyā jaa.e

ādmiyyat ke charāġhoñ kī laveñ tez karo

na ho aisā ki badan chhoḌ ke saaya jaa.e

manzileñ aisī bhī haiñ fikr-e-bashar se aage

jin kī had meñ na ishāra na kināya jaa.e

'shauq' dil naam to hai ek chaman zaḳhmoñ kā

silsila is kā magar kis se milāyā jaa.e

lala-o-gul ka lahu lakh bahaya jae

ye chaman chhoD ke hum se to na jaya jae

phir rahe hain sabhi chehron pe naqaben Dale

kis ko haalat ka aaina dikhaya jae

rang par jashn-e-bahaaran jabhi aa sakta hai

phul kanTon mein koi farq na paya jae

apni tahzib hi iKHlas-o-rawadari hai

is ko haTne se ba-har-haal bachaya jae

sab barabar ke hain haqdar chaman-sazi mein

phir kise harf-e-ghalat kah ke miTaya jae

KHud-baKHud qaum ki taqdir sanwar jaegi

pahle bigDa hua mahaul banaya jae

ji rahe hain sabhi ehsas kuchal kar apna

ab kise dard ka ehsas dilaya jae

sirf hum uTh gae upar to koi shan nahin

shan to ye hai ki girton ko uThaya jae

KHun basta hai tamannaon ka aankhen kya hain

kaun sa KHwab nigahon mein basaya jae

aadmiyyat ke charaghon ki lawen tez karo

na ho aisa ki badan chhoD ke saya jae

manzilen aisi bhi hain fikr-e-bashar se aage

jin ki had mein na ishaara na kinaya jae

'shauq' dil nam to hai ek chaman zaKHmon ka

silsila is ka magar kis se milaya jae