laun main kahan se bhala andaz-e-bayan aur

lā.ūñ maiñ kahāñ se bhalā andāz-e-bayāñ aur

munsif kī zabāñ aur hai aur merī zabāñ aur

ye dard samajhtā nahīñ ādāb-e-zamāna

koshish ho chhupāne kī to hotā hai ayaañ aur

qismat kā likhā maan le thoḌe se ziyāñ ko

jā.egā adālat meñ to pā.egā ziyāñ aur

tafsīl bayāñ kartā hai kyoñ apne amal kī

is tarah to har shaḳhs pe guzregā gumāñ aur

manzil pe pahuñch kar na huā dil jo mirā ḳhush

pūchhī jo vaj.h us ne kahā aur amaañ aur

tum se bhī kahāñ mujh ko samā.at kī tavaqqo

mujh meñ bhī kahāñ baaqī hai ab tāb-e-fuġhāñ aur

ye zulm ke sho.ale haiñ faqat ḳhuuñ se bujheñge

ashkoñ se bujhāoge to uTThegā dhuāñ aur

laun main kahan se bhala andaz-e-bayan aur

munsif ki zaban aur hai aur meri zaban aur

ye dard samajhta nahin aadab-e-zamana

koshish ho chhupane ki to hota hai ayan aur

qismat ka likha man le thoDe se ziyan ko

jaega adalat mein to paega ziyan aur

tafsil bayan karta hai kyon apne amal ki

is tarah to har shaKHs pe guzrega guman aur

manzil pe pahunch kar na hua dil jo mera KHush

puchhi jo wajh us ne kaha aur aman aur

tum se bhi kahan mujh ko samaat ki tawaqqo

mujh mein bhi kahan baqi hai ab tab-e-fughan aur

ye zulm ke shoale hain faqat KHun se bujhenge

ashkon se bujhaoge to uTThega dhuan aur