lab-ba-lab bint-ul-anab har-dam rahe

lab-ba-lab bint-ul-anab har-dam rahe

daur-daur-e-jām-e-mai jam jam rahe

zikr-e-qumrī bhī jo karte ham rahe

us sahī qāmat kā bharte dam rahe

dūd-e-ḳhat ho yā duḳhān-e-zulf ho

jis jagah dhūnī ramā.ī ram rahe

shoḳh kaisā hai aqīq-e-surḳh ho

la.al-e-lab se rañg meñ maddham rahe

nā-tavānī ne biThāyā jis jagah

phir na uTThe lais ho kar jam rahe

jab maiñ royā bārish-e-bārāñ huī

khul gayā muñh ashk jis dam tham rahe

'shād' pīchhā kar ke ġhaul-e-nafs kā

rāh-e-haq bhūle-bhaTakte ham rahe

lab-ba-lab bint-ul-anab har-dam rahe

daur-daur-e-jam-e-mai jam jam rahe

zikr-e-qumri bhi jo karte hum rahe

us sahi qamat ka bharte dam rahe

dud-e-KHat ho ya duKHan-e-zulf ho

jis jagah dhuni ramai ram rahe

shoKH kaisa hai aqiq-e-surKH ho

lal-e-lab se rang mein maddham rahe

na-tawani ne biThaya jis jagah

phir na uTThe lais ho kar jam rahe

jab main roya barish-e-baran hui

khul gaya munh ashk jis dam tham rahe

'shad' pichha kar ke ghaul-e-nafs ka

rah-e-haq bhule-bhaTakte hum rahe