lab-basta hun behis hun main mahrum-e-sada hun

lab-basta huuñ behis huuñ maiñ mahrūm-e-sadā huuñ

ik sang-e-girāñ ban ke sar-e-rāh paḌā huuñ

khulte hī nahīñ shahr-e-nigārāñ ke darīche

kab se maiñ yūñhī kāsa-e-dil le ke khaḌā huuñ

armān-o-tamanna kā uThā.e hue lāsha

sahrā meñ bagūle kī tarah ghuum rahā huuñ

din-bhar ġham-e-ayyām ke sahrā meñ bhaTak kar

har raat kisī yaad kī bhaTTī meñ jalā huuñ

ik talḳh haqīqat ko chhupā.e hue dil meñ

har sub.h-o-masā dard kī suulī pe chaḌhā huuñ

lab-basta hun behis hun main mahrum-e-sada hun

ek sang-e-giran ban ke sar-e-rah paDa hun

khulte hi nahin shahr-e-nigaran ke dariche

kab se main yunhi kasa-e-dil le ke khaDa hun

arman-o-tamanna ka uThae hue lasha

sahra mein bagule ki tarah ghum raha hun

din-bhar gham-e-ayyam ke sahra mein bhaTak kar

har raat kisi yaad ki bhaTTi mein jala hun

ek talKH haqiqat ko chhupae hue dil mein

har subh-o-masa dard ki suli pe chaDha hun