lab chup hain to kya dil gila-pardaz nahin hai

lab chup haiñ to kyā dil gila-pardāz nahīñ hai

sab kuchh hai ḳhamoshī meñ ik āvāz nahīñ hai

kitnā hī vo jhiḌkeñ maiñ kahe jaatā huuñ apnī

ġhairat mirī ab kuchh ḳhalal-andāz nahīñ hai

pahūchuñgā zarūr aaj maiñ us shoḳh ke ghar meñ

dīvār to nīchī hai jo dar-bāz nahīñ hai

is samt maraz ishq kā anjām ko pahūñchā

is samt tavajjoh kā bhī āġhāz nahīñ hai

kyā sāda-dilī hai ki tirī chīn-e-jabīñ ko

maiñ naaz samajhtā huuñ magar naaz nahīñ hai

marnā thā ki sehat maraz-e-ishq se paa.ī

ab kuchh bhī tabī.at nā-sāz nahīñ hai

kyuuñ sach ye kahā us ne ki ulfat nahīñ mujh se

ye aib hī zālim meñ ki dam-bāz nahīñ hai

rote hue jiine se ajal ishq meñ achchhī

murde meñ ye ḳhūbī hai ki ġhammāz nahīñ hai

zillat mujhe manzūr magar aa.uuñ tire ghar

kyā harj mohabbat kā jo e.azāz nahīñ hai

kyuuñ baiThe haiñ ham vāda-e-mahbūb pe ḳhush ḳhush

kyā kho.e talavvun bhī dar-andāz nahīñ hai

ai 'shauq' kahe detī hai kuchh shakl ḳhamoshī

chup kyuuñ ho agar dil meñ koī raaz nahīñ hai

lab chup hain to kya dil gila-pardaz nahin hai

sab kuchh hai KHamoshi mein ek aawaz nahin hai

kitna hi wo jhiDken main kahe jata hun apni

ghairat meri ab kuchh KHalal-andaz nahin hai

pahuchunga zarur aaj main us shoKH ke ghar mein

diwar to nichi hai jo dar-baz nahin hai

is samt maraz ishq ka anjam ko pahuncha

is samt tawajjoh ka bhi aaghaz nahin hai

kya sada-dili hai ki teri chin-e-jabin ko

main naz samajhta hun magar naz nahin hai

marna tha ki sehat maraz-e-ishq se pai

ab kuchh bhi tabiat na-saz nahin hai

kyun sach ye kaha us ne ki ulfat nahin mujh se

ye aib hi zalim mein ki dam-baz nahin hai

rote hue jine se ajal ishq mein achchhi

murde mein ye KHubi hai ki ghammaz nahin hai

zillat mujhe manzur magar aaun tere ghar

kya harj mohabbat ka jo eazaz nahin hai

kyun baiThe hain hum wada-e-mahbub pe KHush KHush

kya khoe talawwun bhi dar-andaz nahin hai

ai 'shauq' kahe deti hai kuchh shakl KHamoshi

chup kyun ho agar dil mein koi raaz nahin hai