lab-e-gul ki hansi degi na tumko raushni apni

lab-e-gul kī hañsī degī na tum ko raushnī apnī

zarā shabnam ke ashkoñ meñ bhī dekhūñ zindagī apnī

hameñ kyā ġham ki ham ik zamzama-pardāz-e-gulshan the

bahāroñ ko huī mahsūs gulshan meñ kamī apnī

mujhe mahfil kī nazroñ se nazar aatā hai mahfil meñ

gavārā ḳhātir-e-rañgīñ ko hai sāda-dilī apnī

mire dil kī taraf ik baar bhejī thī kiran us ne

bhulā dī chāñd ne us raat se tābindagī apnī

jo rahbar kārvāñ ko manziloñ ke naam par luuTe

batā ai ham-safar achchhī nahīñ kyā gumrahī apnī

ye sab jām-o-subū ḳhālī saverā tishna-kāmī kā

ki ab kal ke liye rahne de kuchh sāqī-garī apnī

sharāb o shāhid o shahd-e-tarannum nashsha-e-ishrat

inhī meñ parvarish paatī rahī hai tishnagī apnī

nigah gustāḳh tevar tund kaun aayā sar-e-mahfil

'niyāz' aate hī tere fikr sab ko ho ga.ī apnī

lab-e-gul ki hansi degi na tum ko raushni apni

zara shabnam ke ashkon mein bhi dekhun zindagi apni

hamein kya gham ki hum ek zamzama-pardaz-e-gulshan the

bahaaron ko hui mahsus gulshan mein kami apni

mujhe mahfil ki nazron se nazar aata hai mahfil mein

gawara KHatir-e-rangin ko hai sada-dili apni

mere dil ki taraf ek bar bheji thi kiran us ne

bhula di chand ne us raat se tabindagi apni

jo rahbar karwan ko manzilon ke nam par luTe

bata ai ham-safar achchhi nahin kya gumrahi apni

ye sab jam-o-subu KHali sawera tishna-kaami ka

ki ab kal ke liye rahne de kuchh saqi-gari apni

sharab o shahid o shahd-e-tarannum nashsha-e-ishrat

inhi mein parwarish pati rahi hai tishnagi apni

nigah gustaKH tewar tund kaun aaya sar-e-mahfil

'niyaz' aate hi tere fikr sab ko ho gai apni