lab-e-KHamosh mujhe aah aah karne de

lab-e-ḳhamosh mujhe aah aah karne de

gunāh ishq sahī ye gunāh karne de

tū kāmyāb nigāhoñ ko sharmsār na kar

isī tarah sitam-e-be-panāh karne de

abhī se dars-e-haqīqat zarā Thahar vaa.iz

ḳhirad ko aur ḳharāb-e-nigāh karne de

na rāt-din kī ḳhabar hai na āj-kal kā pata

kisī qarār-shikan se nibāh karne de

na.ī kamāñ hai na.ī mashq hai na rok nigāh

harīm-e-dil ko mukammal tabāh karne de

kahāñ tirī shab-e-gesū kahāñ mirī shab-e-hijr

muqābla bhī nasīb-e-siyāh karne de

na riñd huuñ na sharī.at se zid mujhe 'tālib'

koī balā se kare ishtibāh karne de

lab-e-KHamosh mujhe aah aah karne de

gunah ishq sahi ye gunah karne de

tu kaamyab nigahon ko sharmsar na kar

isi tarah sitam-e-be-panah karne de

abhi se dars-e-haqiqat zara Thahar waiz

KHirad ko aur KHarab-e-nigah karne de

na raat-din ki KHabar hai na aaj-kal ka pata

kisi qarar-shikan se nibah karne de

nai kaman hai nai mashq hai na rok nigah

harim-e-dil ko mukammal tabah karne de

kahan teri shab-e-gesu kahan meri shab-e-hijr

muqabla bhi nasib-e-siyah karne de

na rind hun na shariat se zid mujhe 'talib'

koi bala se kare ishtibah karne de