lab-e-nazuk hai nikal jae na inkar kahin

lab-e-nāzuk hai nikal jaa.e na inkār kahīñ

baat bose kī thī baḌh jaa.e na takrār kahīñ

aise mauqe se ki kuchh ham bhī satā leñ un ko

ham ko milte nahīñ māshūq-e-sitamgār kahīñ

rang laa.e na kahīñ pī ke nikalnā terā

tujh ko rusvā na kare shoḳhī-e-raftār kahīñ

haq-parastī bhī yahīñ bāda-parastī bhī yahīñ

mai-kada chhoḌ ke jaate nahīñ mai-ḳhvār kahīñ

bad-gumāñ ġhair na ho kījiye mujh par na itaab

be-chhue surḳh na ho jaa.eñ ye ruḳhsār kahīñ

aap kā ghar bhī na le ġhair ke ghar ke hamrāh

mujh ko nādim na kare āh-e-sharar-bār kahīñ

lāġharī merī mujhe aaj karegī mahjūb

un ke nāvak ko milegā na dil-e-zār kahīñ

mujh ko Dar hai ki raqīboñ ko na ho jaa.e ḳhabar

sun na le baat mirī aap kī dīvār kahīñ

dil-e-nākāra ko pheñk aa.e galī meñ us kī

na uThe daam jo us ke sar-e-bāzār kahīñ

saare duniyā ke hasīñ jāñch leñ shāyad 'gustāḳh'

koī qismat se nikal aa.e tarahdār kahīñ

lab-e-nazuk hai nikal jae na inkar kahin

baat bose ki thi baDh jae na takrar kahin

aise mauqe se ki kuchh hum bhi sata len un ko

hum ko milte nahin mashuq-e-sitamgar kahin

rang lae na kahin pi ke nikalna tera

tujh ko ruswa na kare shoKHi-e-raftar kahin

haq-parasti bhi yahin baada-parasti bhi yahin

mai-kada chhoD ke jate nahin mai-KHwar kahin

bad-guman ghair na ho kijiye mujh par na itab

be-chhue surKH na ho jaen ye ruKHsar kahin

aap ka ghar bhi na le ghair ke ghar ke hamrah

mujh ko nadim na kare aah-e-sharar-bar kahin

laghari meri mujhe aaj karegi mahjub

un ke nawak ko milega na dil-e-zar kahin

mujh ko Dar hai ki raqibon ko na ho jae KHabar

sun na le baat meri aap ki diwar kahin

dil-e-nakara ko phenk aae gali mein us ki

na uThe dam jo us ke sar-e-bazar kahin

sare duniya ke hasin jaanch len shayad 'gustaKH'

koi qismat se nikal aae tarahdar kahin