لب کشائی کی جسارت بھی نہیں کر سکتے

لب کشائی کی جسارت بھی نہیں کر سکتے

ہم بزرگوں کی شکایت بھی نہیں کر سکتے

قافلہ درد کا ٹھہرا ہے جہاں پر آ کر

ہم وہاں ترک مسافت بھی نہیں کر سکتے

ان کو سونپا ہے مرا کار تحفظ تم نے

جو خود اپنی ہی حفاظت بھی نہیں کر سکتے

بندشیں اپنا مقدر ہیں یہاں پر ہم لوگ

اپنی مرضی سے عبادت بھی نہیں کر سکتے

جو محافظ ہیں وہی لوٹ رہے ہیں ہم کو

ہم تو لٹنے کی شکایت بھی نہیں کر سکتے

روک لیتی ہے قدم بڑھ کے وطن کی خوشبو

ہم تو اب ترک سکونت بھی نہیں کر سکتے