lab-kushai mein zamane se nahin Darna tha

lab-kushā.ī meñ zamāne se nahīñ Darnā thā

umr bhar ham ne kiyā kyā hameñ kyā karnā thā

surḳh-rū kār-e-jahāñ mahfil-e-dil be-raunaq

bhar diyā rañg kahāñ ham ne kahāñ bharnā thā

kis guzargāh se mānūs-e-qadam ho baiThe

us jagah ham ne to paañv hī nahīñ dharnā thā

band āñkhoñ se batā sakte haiñ vo ḳhvāb nagar

is jagah jhiil thī yaañ ham the vahāñ jharnā thā

vaqt lāzim hai magar ai dil-e-barbād tujhe

jism kī maut se pahle to nahīñ marnā thā

ġhairiyat aañkh meñ majbūri-e-hālāt se thī

dil meñ ehsās-e-shanāsā.ī hameñ varna thā

ġhair ne paañv jamāne the yahāñ kāvish se

ham ne ilzām bure vaqt ke sar dharnā thā

ḳhud se milnā thā abhī us se bichhaḌnā thā abhī

ham ko jiinā thā abhī ham ko abhī marnā thā

khā ga.ī barf bahut vaqt se pahle sabza

marġh-zāroñ meñ ġhazāloñ ko abhī charnā thā

lab-kushai mein zamane se nahin Darna tha

umr bhar hum ne kiya kya hamein kya karna tha

surKH-ru kar-e-jahan mahfil-e-dil be-raunaq

bhar diya rang kahan hum ne kahan bharna tha

kis guzargah se manus-e-qadam ho baiThe

us jagah hum ne to panw hi nahin dharna tha

band aankhon se bata sakte hain wo KHwab nagar

is jagah jhil thi yan hum the wahan jharna tha

waqt lazim hai magar ai dil-e-barbaad tujhe

jism ki maut se pahle to nahin marna tha

ghairiyat aankh mein majburi-e-haalat se thi

dil mein ehsas-e-shanasai hamein warna tha

ghair ne panw jamane the yahan kawish se

hum ne ilzam bure waqt ke sar dharna tha

KHud se milna tha abhi us se bichhaDna tha abhi

hum ko jina tha abhi hum ko abhi marna tha

kha gai barf bahut waqt se pahle sabza

margh-zaron mein ghazalon ko abhi charna tha