lab na apne kabhi aaluda-e-fariyaad rahe

lab na apne kabhī ālūda-e-fariyād rahe

ham hujūm-e-ġham-o-ālām meñ bhī shaad rahe

kār-e-ta.amīr-e-nasheman na ruke jur.at-e-shauq

bāġhbāñ laakh take ghaat meñ sayyād rahe

zulf-e-hastī ko bahar-rang sañvārā ham ne

ye alag baat ki ham ḳhasta-o-barbād rahe

dil ko taḌpātī hai biite hue lamhāt kī yaad

kaash aisā ho ke ab kuchh na mujhe yaad rahe

vus.atoñ meñ tirī bhūlā huuñ maiñ tanhā.ī ko

dasht-e-vahshat mire duniyā tirī ābād rahe

kis qadar ḳhuun huā nazr-e-bahār-e-gulshan

ham-safīro ye chaman kaash ab ābād rahe

ranj-o-ġham kī na kaḌī dhuup kabhī un pe paḌī

chhāñv meñ jo tirī zulfoñ kī rahe shaad rahe

apne is fidvī-e-gulshan ko bhī jab aa.e bahār

yaad kar lenā chaman vaalo agar yaad rahe

sab havādis rah-e-manzil ke guzar leñ mujh par

kārvāñ ke liye baaqī na kuchh uftād rahe

qissa-e-dard maiñ kis dil se sunā.ūñ 'qāsid'

sun ke ahvāl mirā kyoñ koī nāshād rahe

lab na apne kabhi aaluda-e-fariyaad rahe

hum hujum-e-gham-o-alam mein bhi shad rahe

kar-e-tamir-e-nasheman na ruke jurat-e-shauq

baghban lakh take ghat mein sayyaad rahe

zulf-e-hasti ko bahar-rang sanwara hum ne

ye alag baat ki hum KHasta-o-barbaad rahe

dil ko taDpati hai bite hue lamhat ki yaad

kash aisa ho ke ab kuchh na mujhe yaad rahe

wusaton mein teri bhula hun main tanhai ko

dasht-e-wahshat mere duniya teri aabaad rahe

kis qadar KHun hua nazr-e-bahaar-e-gulshan

ham-safiro ye chaman kash ab aabaad rahe

ranj-o-gham ki na kaDi dhup kabhi un pe paDi

chhanw mein jo teri zulfon ki rahe shad rahe

apne is fidwi-e-gulshan ko bhi jab aae bahaar

yaad kar lena chaman walo agar yaad rahe

sab hawadis rah-e-manzil ke guzar len mujh par

karwan ke liye baqi na kuchh uftad rahe

qissa-e-dard main kis dil se sunaun 'qasid'

sun ke ahwal mera kyon koi nashad rahe