lab o dandan ka tumhaare jo hai dhyan aaTh pahar

lab o dandāñ kā tumhāre jo hai dhyāñ aaTh pahar

nahīñ lagtī mirī taalū se zabāñ aaTh pahar

ravish-e-sair vo gulshan meñ jo Tuk jā baiThe

bulbuleñ gul ke uThāyā kareñ kaañ aaTh pahar

dar se ab nikle vo kyuuñ us ko to ye hai manzūr

ki nikaltī hī kisī kī rahe jaañ aaTh pahar

kyūñ-ki ḳhūñ-rez rahe tez na vo teġh-e-nigāh

sañg-e-surma se chaḌhā kartī hai saañ aaTh pahar

kahte haiñ sab tire āshiq ko ki shāyad ai vaa.e

hai giraftār-e-musībat ye javāñ aaTh pahar

dil ke lagne se ye dekhā ki lage rahte ham aah

ḳhud-baḳhud muztarib-ul-hāl nadāñ aaTh pahar

jis kā hai dhyān hameñ us ko bhī apnā hai ḳhayāl

vaa.e ġhaflat ki ye ham ko hai gumāñ aaTh pahar

husn-e-ḳhūbī-e-butāñ kuchh na adā ho ba-ḳhudā

kiije gar laakh baras tak ye bayāñ aaTh pahar

turfa us jins-e-mohabbat kā bhī saudā dekhā

suud meñ jis ke rahe ḳhauf-e-ziyāñ aaTh pahar

jab se hai ham se judā aah vo rashk-e-mah-o-mahr

muñh lapeTe haiñ bas aur hai yahī dhyāñ aaTh pahar

raat ko raat samajhte haiñ na ham din ko din

apnī āñkhoñ meñ hai tārīk jahāñ aaTh pahar

in dinoñ aap meñ tujh ko kabhī paate hī nahīñ

kis kā rahtā hai ye 'jur.at' tujhe dhyāñ aaTh pahar

lab o dandan ka tumhaare jo hai dhyan aaTh pahar

nahin lagti meri talu se zaban aaTh pahar

rawish-e-sair wo gulshan mein jo Tuk ja baiThe

bulbulen gul ke uThaya karen kan aaTh pahar

dar se ab nikle wo kyun us ko to ye hai manzur

ki nikalti hi kisi ki rahe jaan aaTh pahar

kyun-ki KHun-rez rahe tez na wo tegh-e-nigah

sang-e-surma se chaDha karti hai san aaTh pahar

kahte hain sab tere aashiq ko ki shayad ai wae

hai giraftar-e-musibat ye jawan aaTh pahar

dil ke lagne se ye dekha ki lage rahte hum aah

KHud-baKHud muztarib-ul-haal nadan aaTh pahar

jis ka hai dhyan hamein us ko bhi apna hai KHayal

wae ghaflat ki ye hum ko hai guman aaTh pahar

husn-e-KHubi-e-butan kuchh na ada ho ba-KHuda

kije gar lakh baras tak ye bayan aaTh pahar

turfa us jins-e-mohabbat ka bhi sauda dekha

sud mein jis ke rahe KHauf-e-ziyan aaTh pahar

jab se hai hum se juda aah wo rashk-e-mah-o-mahr

munh lapeTe hain bas aur hai yahi dhyan aaTh pahar

raat ko raat samajhte hain na hum din ko din

apni aankhon mein hai tarik jahan aaTh pahar

in dinon aap mein tujh ko kabhi pate hi nahin

kis ka rahta hai ye 'jurat' tujhe dhyan aaTh pahar