lab par machalte lafzon ko chakh kar na dekh le

lab par machalte lafzoñ ko chakh kar na dekh le

vo peḌ niim kā mire andar na dekh le

dil ḳhvāhishoñ ke kūche meñ niklā to hai magar

vo tifl-e-dard phir kahīñ patthar na dekh le

raste ka.ī badal ke maiñ lauTā huuñ shahr se

Dar thā ki vo aziiz kahīñ ghar na dekh le

barham bahut hai aaj vo har ek shaḳhs se

apnā hī aa.ine meñ vo paikar na dekh le

būñdeñ lahū kī sūñghtī billī vo dard kī

dil kā lahūluhān kabūtar na dekh le

haiñ paudā lājvantī kā ḳhvāboñ kī mūrateñ

'ikrām' vaqt haath lagā kar na dekh le

lab par machalte lafzon ko chakh kar na dekh le

wo peD nim ka mere andar na dekh le

dil KHwahishon ke kuche mein nikla to hai magar

wo tifl-e-dard phir kahin patthar na dekh le

raste kai badal ke main lauTa hun shahr se

Dar tha ki wo aziz kahin ghar na dekh le

barham bahut hai aaj wo har ek shaKHs se

apna hi aaine mein wo paikar na dekh le

bunden lahu ki sunghti billi wo dard ki

dil ka lahuluhan kabutar na dekh le

hain pauda lajwanti ka KHwabon ki muraten

'ikram' waqt hath laga kar na dekh le