lab pe aaya hi na tha harf-e-tamanna koi

lab pe aayā hī na thā harf-e-tamannā koī

ab ke kartā bhī to kyā kartā mudāvā koī

zindagī tere taġhayyur kī taraf dhyān gayā

jab havāoñ meñ uchhālā gayā sikka koī

chāragar koī na hamdard na muḳhlis na rafīq

shahr-e-be-mehr meñ kis vāste aayā koī

gardish-e-vaqt ko samjhā.e bhalā kaun ye baat

roz chaukhaT pe take hai mirā rasta koī

aa.ine ḳhud chale aate haiñ muqābil mere

shaan meñ paḌhtā hai jab mere qasīda koī

daulat-e-ijz na.ī rut meñ na DhūñDo ki yahāñ

yā to bantā hai yā kartā hai tamāshā koī

ab ke 'āfāq' mirī āñkhoñ meñ aañsū bhī na the

garm miTTī pe taḌaptā rahā pyāsā koī

lab pe aaya hi na tha harf-e-tamanna koi

ab ke karta bhi to kya karta mudawa koi

zindagi tere taghayyur ki taraf dhyan gaya

jab hawaon mein uchhaala gaya sikka koi

chaaragar koi na hamdard na muKHlis na rafiq

shahr-e-be-mehr mein kis waste aaya koi

gardish-e-waqt ko samjhae bhala kaun ye baat

roz chaukhaT pe take hai mera rasta koi

aaine KHud chale aate hain muqabil mere

shan mein paDhta hai jab mere qasida koi

daulat-e-ijz nai rut mein na DhunDo ki yahan

ya to banta hai ya karta hai tamasha koi

ab ke 'afaq' meri aankhon mein aansu bhi na the

garm miTTi pe taDapta raha pyasa koi