lab tak jo na aaya tha wahi harf-e-rasa tha

lab tak jo na aayā thā vahī harf-e-rasā thā

jis ko na maiñ samjhā thā vahī merā ḳhudā thā

maiñ dast-e-sabā ban ke use chheḌ rahā thā

vo ġhuncha-e-nau-ras thā abhī tak na khilā thā

patthar kī tarah phuul mire sar pe lagā thā

is vaqt sabhī ro.e the maiñ sirf hañsā thā

utrā thā rag-o-pai meñ mire zahr ke mānind

vo dard kī sūrat mire pahlū se uThā thā

mahrūm rakhā thā mujhe merī hī anā ne

jo uTh na sakā thā vo mirā dast-e-duā thā

har-chand kī nisbat to mujhe gul se rahī thī

maiñ bū kī tarah pairahan-e-gul se judā thā

mahrūmī kā ehsās rahā us se na mil kar

milne pe ye ehsās magar aur sivā thā

jaise koī kuchh rakh ke kahīñ bhuul gayā ho

is tarah azal se vo mujhe DhūñD rahā thā

lab tak jo na aaya tha wahi harf-e-rasa tha

jis ko na main samjha tha wahi mera KHuda tha

main dast-e-saba ban ke use chheD raha tha

wo ghuncha-e-nau-ras tha abhi tak na khila tha

patthar ki tarah phul mere sar pe laga tha

is waqt sabhi roe the main sirf hansa tha

utra tha rag-o-pai mein mere zahr ke manind

wo dard ki surat mere pahlu se uTha tha

mahrum rakha tha mujhe meri hi ana ne

jo uTh na saka tha wo mera dast-e-dua tha

har-chand ki nisbat to mujhe gul se rahi thi

main bu ki tarah pairahan-e-gul se juda tha

mahrumi ka ehsas raha us se na mil kar

milne pe ye ehsas magar aur siwa tha

jaise koi kuchh rakh ke kahin bhul gaya ho

is tarah azal se wo mujhe DhunD raha tha