لبوں پر ان کے حیات آفریں ہنسی نہ رہی

لبوں پر ان کے حیات آفریں ہنسی نہ رہی

گلوں میں روح ستاروں میں روشنی نہ رہی

خدا شناسوں کی پہچان ہی کوئی نہ رہی

کہ سرکشی بھی بہ انداز سرکشی نہ رہی

فسانہ گردش دوراں کا نظم کر لیتے

مگر نگاہ میں ان کی وہ برہمی نہ رہی

وقار ذوق تجسس پہ حرف آئے گا

اگر شریک سفر اپنے گمرہی نہ رہی

ہے اپنا سوز تبسم شریک ساز چمن

اسیر گریۂ شبنم کوئی کلی نہ رہی

رہے نگاہ میں آداب لغزش الفت

خودی سے دب کے کبھی اپنی بے خودی نہ رہی

ملا تھا موقع تکمیل داستان حیات

جبین گل پہ شکن اور کھیلتی نہ رہی

شب فراق کچھ ایسے بھی حادثے گزرے

چراغ جلتے رہے اور روشنی نہ رہی

بنائے ہم نے شفاؔ دوستی کے وہ سانچے

کہ دشمنوں کو تمنائے دشمنی نہ رہی