labon pe hai jo tabassum to aankh pur-nam hai

laboñ pe hai jo tabassum to aañkh pur-nam hai

shu.ūr-e-ġham kā ye aalam ajiib aalam hai

guzar na jāda-e-imkāñ se be-ḳhayālī meñ

yahīñ kahīñ tirī jannat yahīñ jahannam hai

bhaTak rahā hai dil imroz ke añdheroñ meñ

nishān-e-manzil-e-fardā bahut hī mub.ham hai

baḌhā diyā hai asīroñ kī ḳhasta-hālī ne

qafas se tā-ba-chaman varna fāsla kam hai

abhī nahīñ kisī aalam meñ dil Thaharne kā

abhī nazar meñ tirī anjuman kā aalam hai

kahāñ ye zindagi-e-harza-gard le aa.ī

na rahguzār-e-tarab hai na jāda-e-ġham hai

kuchh aise ham ne tire ġham kī parvarish kī hai

ki jaise maqsad-e-hastī faqat tirā ġham hai

labon pe hai jo tabassum to aankh pur-nam hai

shuur-e-gham ka ye aalam ajib aalam hai

guzar na jada-e-imkan se be-KHayali mein

yahin kahin teri jannat yahin jahannam hai

bhaTak raha hai dil imroz ke andheron mein

nishan-e-manzil-e-farda bahut hi mubham hai

baDha diya hai asiron ki KHasta-haali ne

qafas se ta-ba-chaman warna fasla kam hai

abhi nahin kisi aalam mein dil Thaharne ka

abhi nazar mein teri anjuman ka aalam hai

kahan ye zindagi-e-harza-gard le aai

na rahguzar-e-tarab hai na jada-e-gham hai

kuchh aise hum ne tere gham ki parwarish ki hai

ki jaise maqsad-e-hasti faqat tera gham hai