labon se aankh se ruKHsar se kya kya nahin karta

laboñ se aañkh se ruḳhsār se kyā kyā nahīñ kartā

vo jaadū kaun sā hai jo ki vo chehra nahīñ kartā

maiñ saare kāġhazoñ pe ek misra likh ke rakkhūñgā

vo jab tak aa ke mere sher ko puurā nahīñ kartā

fasādoñ meñ jo shāmil haiñ vo mohre haiñ siyāsat ke

ḳhud apne aap koī bhī yahāñ dañgā nahīñ kartā

havāoñ meñ nagar kī is qadar kuchh zahr phailā hai

na gul dete haiñ ḳhushbū peḌ bhī saayā nahīñ kartā

jo likhtā huuñ vo hotā hai faqat taskīn kī ḳhātir

maiñ apnī shā.irī kā shahr meñ saudā nahīñ kartā

mujhe manzūr hai bīmār rahnā umr-bhar yuuñ hī

vo jab tak haath se chhū kar mujhe achchhā nahīñ kartā

chalo maanā ki apnī ahmiyat hai 'shoḳh' daulat kī

zamāne meñ magar har kaam hī paisa nahīñ kartā

labon se aankh se ruKHsar se kya kya nahin karta

wo jadu kaun sa hai jo ki wo chehra nahin karta

main sare kaghazon pe ek misra likh ke rakkhunga

wo jab tak aa ke mere sher ko pura nahin karta

fasadon mein jo shamil hain wo mohre hain siyasat ke

KHud apne aap koi bhi yahan danga nahin karta

hawaon mein nagar ki is qadar kuchh zahr phaila hai

na gul dete hain KHushbu peD bhi saya nahin karta

jo likhta hun wo hota hai faqat taskin ki KHatir

main apni shairi ka shahr mein sauda nahin karta

mujhe manzur hai bimar rahna umr-bhar yun hi

wo jab tak hath se chhu kar mujhe achchha nahin karta

chalo mana ki apni ahmiyat hai 'shoKH' daulat ki

zamane mein magar har kaam hi paisa nahin karta