لبوں سے ٹوٹ جاتا ہے کبھی آواز کا رشتہ

لبوں سے ٹوٹ جاتا ہے کبھی آواز کا رشتہ

بہت نازک ہوا کرتا ہے سوز و ساز کا رشتہ

تعلق ہے تو بس ہم سے محبت ہے تو بس ہم سے

خدا جانے یہ کیسا ہے ترے انداز کا رشتہ

ہمارے دل کے زخموں کو جگاتا ہے سلاتا ہے

کبھی انجام کا رشتہ کبھی آغاز کا رشتہ

دل ناداں ہوا ہے بارہا زخمی تو کیا غم ہے

ہمیں منظور ہے پھر بھی نگاہ ناز کا رشتہ

گلے لگ جائیں ہم بھی کہ رواداری کا موسم ہے

نبھاتے ہیں یہاں کانٹے بھی گل سے ناز کا رشتہ

ہمارے فکر و فن کی روشنی میں ہم تو زندہ ہیں

یوںہی پیدا نہیں ہوتا کہیں اعزاز کا رشتہ

نئی اک زندگی دیتا ہے لفظوں کو تر و تازہ

کبھی اسلوب کا رشتہ کبھی الفاظ کا رشتہ

نظرؔ ہر پوچھنے والے کو اتنا ہی بتا دیتا

ہمیں اب کھائے جاتا ہے کسی دم ساز کا رشتہ