labon se TuT jata hai kabhi aawaz ka rishta

laboñ se TuuT jaatā hai kabhī āvāz kā rishta

bahut nāzuk huā kartā hai soz-o-sāz kā rishta

ta'alluq hai to bas ham se mohabbat hai to bas ham se

ḳhudā jaane ye kaisā hai tire andāz kā rishta

hamāre dil ke zaḳhmoñ ko jagātā hai sulātā hai

kabhī anjām kā rishta kabhī āġhāz kā rishta

dil-e-nādāñ huā hai bārhā zaḳhmī to kyā ġham hai

hameñ manzūr hai phir bhī nigāh-e-nāz kā rishta

gale lag jaa.eñ ham bhī ki ravādārī kā mausam hai

nibhāte haiñ yahāñ kāñTe bhī gul se naaz kā rishta

hamāre fikr-o-fan kī raushnī meñ ham to zinda haiñ

yūñhī paidā nahīñ hotā kahīñ e.azāz kā rishta

na.ī ik zindagī detā hai lafzoñ ko tar-o-tāza

kabhī uslūb kā rishta kabhī alfāz kā rishta

'nazar' har pūchhne vaale ko itnā hī batā detā

hameñ ab khaa.e jaatā hai kisī dam-sāz kā rishta

labon se TuT jata hai kabhi aawaz ka rishta

bahut nazuk hua karta hai soz-o-saz ka rishta

ta'alluq hai to bas hum se mohabbat hai to bas hum se

KHuda jaane ye kaisa hai tere andaz ka rishta

hamare dil ke zaKHmon ko jagata hai sulata hai

kabhi anjam ka rishta kabhi aaghaz ka rishta

dil-e-nadan hua hai barha zaKHmi to kya gham hai

hamein manzur hai phir bhi nigah-e-naz ka rishta

gale lag jaen hum bhi ki rawadari ka mausam hai

nibhate hain yahan kanTe bhi gul se naz ka rishta

hamare fikr-o-fan ki raushni mein hum to zinda hain

yunhi paida nahin hota kahin eazaz ka rishta

nai ek zindagi deta hai lafzon ko tar-o-taza

kabhi uslub ka rishta kabhi alfaz ka rishta

'nazar' har puchhne wale ko itna hi bata deta

hamein ab khae jata hai kisi dam-saz ka rishta