lachakti shaKH pe jab bhi nai kali aai

lachaktī shāḳh pe jab bhī na.ī kalī aa.ī

udaas phūloñ ko be-sāḳhta hañsī aa.ī

savāl ye nahīñ ahd-e-vafā kiyā us ne

savāl ye hai mohabbat meñ kyoñ kamī aa.ī

hasīn daur javānī kā jab gañvā baiThe

mizāj-e-ishq meñ tab jā ke puḳhtagī aa.ī

hazār tark-e-ta.alluq kiyā hai us ne magar

mire ḳhulūs meñ ab tak na kuchh kamī aa.ī

ġham-e-jahāñ meñ hue mubtalā to ai 'ambar'

hañsī milī na hameñ raas phir ḳhushī aa.ī

lachakti shaKH pe jab bhi nai kali aai

udas phulon ko be-saKHta hansi aai

sawal ye nahin ahd-e-wafa kiya us ne

sawal ye hai mohabbat mein kyon kami aai

hasin daur jawani ka jab ganwa baiThe

mizaj-e-ishq mein tab ja ke puKHtagi aai

hazar tark-e-talluq kiya hai us ne magar

mere KHulus mein ab tak na kuchh kami aai

gham-e-jahan mein hue mubtala to ai 'ambar'

hansi mili na hamein ras phir KHushi aai