laDate hi nazar saqi se chakraata hai sar apna

laḌāte hī nazar saaqī se chakrātā hai sar apnā

ye vo mai hai ki piite hī dikhātī hai asar apnā

kareñ vo mahfil-e-aġhyār se kyoñ ruḳh idhar apnā

fuġhāñ hai be-asar naala hai māyūs-e-asar apnā

dikhāte haiñ jise vo jalva-e-barq-e-nazar apnā

vo rah jaatā hai hāthoñ se kaleja thaam kar apnā

bhare gul-hā-e-nazzāra se dāmān-e-nazar apnā

muqaddar jaag uThe jalva dikhā.eñ vo agar apnā

kare teġh-e-nigāh-e-nāz lohā tez-tar apnā

lahū meñ Dūbne ko dil bhī hai siina sipar apnā

kaThin rāh-e-adam hai aur apnī shām-e-ġhurbat hai

na koī ham-safar apnā na koī rāhbar apnā

hujūm-e-ārzū meñ ye kahīñ gum ho gayā hogā

mire dil meñ ḳhud aa kar DhūñDh lo tīr-e-nazar apnā

dikhā do rū-e-raushan kī jhalak sadqa javānī kā

tumhāre sāmne phailā hai dāmān-e-nazar apnā

dam-e-āḳhir hai vo bahr-e-‘ayādat aane vaale haiñ

na TuuTe aur dam-bhar rishta-e-tār-e-nazar apnā

rasā.ī dekhiye kab tā-dar-e-maqsūd hotī hai

nahīñ juz zauq-e-sādiq aur koī rāhbar apnā

ye nā-mumkin ki laa.e taab tere rū-e-raushan kī

agar muñh chashma-e-ḳhurshīd meñ dho.e sahar apnā

azal se shāhid-e-husn-e-butāñ kā maiñ pujārī huuñ

nazar aatā hai but-ḳhāna to jhuk jaatā hai sar apnā

laDate hi nazar saqi se chakraata hai sar apna

ye wo mai hai ki pite hi dikhati hai asar apna

karen wo mahfil-e-aghyar se kyon ruKH idhar apna

fughan hai be-asar nala hai mayus-e-asar apna

dikhate hain jise wo jalwa-e-barq-e-nazar apna

wo rah jata hai hathon se kaleja tham kar apna

bhare gul-ha-e-nazzara se daman-e-nazar apna

muqaddar jag uThe jalwa dikhaen wo agar apna

kare tegh-e-nigah-e-naz loha tez-tar apna

lahu mein Dubne ko dil bhi hai sina sipar apna

kaThin rah-e-adam hai aur apni sham-e-ghurbat hai

na koi ham-safar apna na koi rahbar apna

hujum-e-arzu mein ye kahin gum ho gaya hoga

mere dil mein KHud aa kar DhunDh lo tir-e-nazar apna

dikha do ru-e-raushan ki jhalak sadqa jawani ka

tumhaare samne phaila hai daman-e-nazar apna

dam-e-aKHir hai wo bahr-e-‘ayaadat aane wale hain

na TuTe aur dam-bhar rishta-e-tar-e-nazar apna

rasai dekhiye kab ta-dar-e-maqsud hoti hai

nahin juz zauq-e-sadiq aur koi rahbar apna

ye na-mumkin ki lae tab tere ru-e-raushan ki

agar munh chashma-e-KHurshid mein dhoe sahar apna

azal se shahid-e-husn-e-butan ka main pujari hun

nazar aata hai but-KHana to jhuk jata hai sar apna