lafz-dar-lafz maani pe maani nikle

lafz-dar-lafz ma.ānī pe ma.ānī nikle

saath ash.ār ke kuchh dard-e-nihānī nikle

jo zabāñ tak pe na thā us pe amal kar Daalā

aur va.ade the jo sab un ke zabānī nikle

mere aañsū nazar aa sakte nahīñ duniyā ko

ḳhūn-e-dil ban ke bhī gar aañkh kā paanī nikle

dard yakjā the mire dil ko kiye the raushan

dard mere the jo sab kāh-kashānī nikle

zor-e-girya thā vo dil kā ki nahīñ rok sakī

ashk āñkhoñ se magar bahr-e-ravānī nikle

maiñ bhī ḳhushiyoñ ko chunūñgī sabhī logoñ kī tarah

shāḳh-e-ummīd pe gar raat kī raanī nikle

umr-bhar kī na sazā koī kisī ko de yahāñ

muntazir ban ke kisī kī na javānī nikle

ġham tire aise ki tujh pe hī jachenge 'resham'

tū vo insāñ ki tirā koī na saanī nikle

lafz-dar-lafz maani pe maani nikle

sath ashaar ke kuchh dard-e-nihani nikle

jo zaban tak pe na tha us pe amal kar Dala

aur wade the jo sab un ke zabani nikle

mere aansu nazar aa sakte nahin duniya ko

KHun-e-dil ban ke bhi gar aankh ka pani nikle

dard yakja the mere dil ko kiye the raushan

dard mere the jo sab kah-kashani nikle

zor-e-girya tha wo dil ka ki nahin rok saki

ashk aankhon se magar bahr-e-rawani nikle

main bhi KHushiyon ko chunungi sabhi logon ki tarah

shaKH-e-ummid pe gar raat ki rani nikle

umr-bhar ki na saza koi kisi ko de yahan

muntazir ban ke kisi ki na jawani nikle

gham tere aise ki tujh pe hi jachenge 'resham'

tu wo insan ki tera koi na sani nikle