lafz mil jaen to ash’ar ki tashkil karun

lafz mil jaa.eñ to ash’ār kī tashkīl karūñ

varna kis tarah ḳhayālāt kī tarsīl karūñ

haq mohabbat kā kahāñ hotā hai marne se adā

haq to ye hai ki tujhe ruuh meñ tahlīl karūñ

aap to apnī anā se nahīñ nikle bāhar

mujh se kahte haiñ ki maiñ nazriya tabdīl karūñ

tishnagī to hai mirī zaat meñ sahrā kī tarah

kaise sūkhī huī āñkhoñ ko bhalā jhiil karūñ

jab anā hai mirī rag rag meñ sarāyat 'ambar'

kis tarah us ke har ik hukm kī ta.amīl karūñ

lafz mil jaen to ash’ar ki tashkil karun

warna kis tarah KHayalat ki tarsil karun

haq mohabbat ka kahan hota hai marne se ada

haq to ye hai ki tujhe ruh mein tahlil karun

aap to apni ana se nahin nikle bahar

mujh se kahte hain ki main nazriya tabdil karun

tishnagi to hai meri zat mein sahra ki tarah

kaise sukhi hui aankhon ko bhala jhil karun

jab ana hai meri rag rag mein sarayat 'ambar'

kis tarah us ke har ek hukm ki tamil karun