lafz phisla tere honTon se hawa mein utra

lafz phislā tire hoñToñ se havā meñ utrā

merā ilhām thā jo terī sadā meñ utrā

nek bandoñ ke liye der thī bas rone meñ

phir to jo maiñ ne kahā un kī razā meñ utrā

sīḌhiyoñ se the jo vāqif vahī ghar tak pahuñche

maiñ to vo shaḳhs thā jo sīdhā havā meñ utrā

ḳhush thā jab ghar meñ vo mehmāñ kī tarah baiThā thā

ek dīvār jo phāñdī to ḳhalā meñ utrā

muḳhtasar kitnā thā us nanhe parinde kā safar

surma.ī aañkh se jo dast-e-duā meñ utrā

tū bhī be-ghar huā aur aur maiñ ne bhī duniyā chhoḌī

kaun sā zahr hamāre kaf-e-pā meñ utrā

'zāhid' is baar to bārish ne rulāyā itnā

dard kā indr-dhanush ġham ke ḳhalā meñ utrā

lafz phisla tere honTon se hawa mein utra

mera ilham tha jo teri sada mein utra

nek bandon ke liye der thi bas rone mein

phir to jo main ne kaha un ki raza mein utra

siDhiyon se the jo waqif wahi ghar tak pahunche

main to wo shaKHs tha jo sidha hawa mein utra

KHush tha jab ghar mein wo mehman ki tarah baiTha tha

ek diwar jo phandi to KHala mein utra

muKHtasar kitna tha us nanhe parinde ka safar

surmai aankh se jo dast-e-dua mein utra

tu bhi be-ghar hua aur aur main ne bhi duniya chhoDi

kaun sa zahr hamare kaf-e-pa mein utra

'zahid' is bar to barish ne rulaya itna

dard ka indr-dhanush gham ke KHala mein utra