lafzon ke siyah pairahan mein lipTi hui kuchh tanwiren hain

lafzoñ ke siyah pairāhan meñ lipTī huī kuchh tanvīreñ haiñ

ai dīda-varo pahchāno to kis haath kī ye tahrīreñ haiñ

jaatī huī rut kab ruktī hai ai dil ye 'abas tadbīreñ haiñ

jo qaid havāoñ ko kar leñ kyā aisī bhī kuchh zanjīreñ haiñ

naġhma vo kis ne chheḌā hai bichhḌe hue ġham sab aan mile

āvāz kī lahroñ par larzāñ sau mohr-ba-lab tasvīreñ haiñ

āvāra havā ke jhoñkoñ par aksar ye gumāñ guzrā jaise

ye ham se pareshāñ-hāloñ kī be-samt-o-jehat taqdīreñ haiñ

is shahr meñ le kar aa.e haiñ ham shabnam-o-gul kī sauġhāteñ

āñkhoñ meñ jahāñ angāre haiñ hāthoñ meñ jahāñ shamshīreñ haiñ

kuchh ḳhvāb ujāloñ ke ham ne dekhe the magar tā-hadd-e-nazar

jo zulmat ban kar phail ga.iiñ kin ḳhvāboñ kī ta.abīreñ haiñ

kyuuñ aaj kī jānī-pahchānī shakloñ se nazar mānūs nahīñ

āñkhoñ meñ jo phirtī rahtī haiñ kis daur kī ye tasvīreñ haiñ

ham apnī zaat ke zindāñ se bāhar jo nikal aa.e bhī to kyā

qadmoñ se jo lipTī paḌtī haiñ rāheñ ye nahīñ zanjīreñ haiñ

lafzon ke siyah pairahan mein lipTi hui kuchh tanwiren hain

ai dida-waro pahchano to kis hath ki ye tahriren hain

jati hui rut kab rukti hai ai dil ye 'abas tadbiren hain

jo qaid hawaon ko kar len kya aisi bhi kuchh zanjiren hain

naghma wo kis ne chheDa hai bichhDe hue gham sab aan mile

aawaz ki lahron par larzan sau mohr-ba-lab taswiren hain

aawara hawa ke jhonkon par aksar ye guman guzra jaise

ye hum se pareshan-haalon ki be-samt-o-jehat taqdiren hain

is shahr mein le kar aae hain hum shabnam-o-gul ki saughaten

aankhon mein jahan angare hain hathon mein jahan shamshiren hain

kuchh KHwab ujalon ke hum ne dekhe the magar ta-hadd-e-nazar

jo zulmat ban kar phail gain kin KHwabon ki tabiren hain

kyun aaj ki jaani-pahchani shaklon se nazar manus nahin

aankhon mein jo phirti rahti hain kis daur ki ye taswiren hain

hum apni zat ke zindan se bahar jo nikal aae bhi to kya

qadmon se jo lipTi paDti hain rahen ye nahin zanjiren hain