laga ke dhaDkan mein aag meri ba-rang-e-raqs-e-sharar gaya wo

lagā ke dhaḌkan meñ aag merī ba-rañg-e-raqs-e-sharar gayā vo

mujhe banā ke sulagtā sahrā mire jahāñ se guzar gayā vo

yuuñ niiñd se kyuuñ mujhe jagā kar charāġh-e-ummīd phir jalā kar

huī sahar to use bujhā kar havā ke jaisā guzar gayā vo

vo ret par ik nishān jaisā thā mom ke ik makān jaisā

baḌā sambhal kar chhuā thā maiñ ne pa ek pal meñ bikhar gayā vo

vo saath mere thā jaise har pal vo dekhtā thā mujhe musalsal

zarā sā mausam badal gayā to churā ke mujh se nazar gayā vo

vo ek bichhḌe se miit jaisā vo ik bhulā.e se giit jaisā

koī purānī sī dhun jagā kar vajūd-o-dil meñ utar gayā vo

vo dost saare the chaar pal ke jo chal diye ham-safar badal ke

'sahāb'-e-nādāñ vahīñ khaḌā hai usī Dagar par Thahar gayā vo

laga ke dhaDkan mein aag meri ba-rang-e-raqs-e-sharar gaya wo

mujhe bana ke sulagta sahra mere jahan se guzar gaya wo

yun nind se kyun mujhe jaga kar charagh-e-ummid phir jala kar

hui sahar to use bujha kar hawa ke jaisa guzar gaya wo

wo ret par ek nishan jaisa tha mom ke ek makan jaisa

baDa sambhal kar chhua tha main ne pa ek pal mein bikhar gaya wo

wo sath mere tha jaise har pal wo dekhta tha mujhe musalsal

zara sa mausam badal gaya to chura ke mujh se nazar gaya wo

wo ek bichhDe se mit jaisa wo ek bhulae se git jaisa

koi purani si dhun jaga kar wajud-o-dil mein utar gaya wo

wo dost sare the chaar pal ke jo chal diye ham-safar badal ke

'sahab'-e-nadan wahin khaDa hai usi Dagar par Thahar gaya wo