لگا کچھ ایسا کہ نبض حیات رک سی گئی

لگا کچھ ایسا کہ نبض حیات رک سی گئی

کسی کے ہونٹوں پہ جب آ کے بات رک سی گئی

کسی کے دم سے تھے گردش میں آسمان و زمیں

کسی کے رکتے ہی یہ کائنات رک سی گئی

ٹھہر سکی نہ کہیں جگمگاتی بستی میں

مرے مکان میں آئی تو رات رک سی گئی

سمجھ لیا تھا کہ تیرہ شبی ہے اپنا نصیب

چراغ عزم جلاتے ہی رات رک سی گئی

جلا کے کشتیاں جب عزم نو کے ساتھ بڑھے

جو ہو رہی تھی مسلسل وہ مات رک سی گئی

اسے میں کیف دل و جاں کہوں کہ موج سراب

حیات رک سی گئی ہے ممات رک سی گئی

مرا وجود ہی وجہ فساد تھا شاید

بہا کے خون مرا واردات رک سی گئی

فضائے شہر مکدر ہوئی ہے جب سے شریفؔ

ہر آرزو کی سہانی برات رک سی گئی