laga raha hun har ek dar pe aaina bazar

lagā rahā huuñ har ik dar pe aa.inā bāzār

koī to dekhe sune daam boltā bāzār

sajā to ḳhuub hai ab ke nayā nayā bāzār

zamāna jaan to le kyā hai zā.iqa bāzār

parā.e jaan kī qīmat faqat nazāra nahīñ

ḳhudārā band ho har din kā hādsa bāzār

yahī to hotā hai shīshe ke kārobār kā hashr

ujaḌ gayā hai achānak harā-bharā bāzār

shab-e-siyāh se ḳhā.if hai yuuñ mirī dīvār

sajā ke baiThī hai āñgan meñ shaam kā bāzār

bas ik tabassum-e-dil se ḳharīd liije ise

jahāñ bhī jā.iye is jaañ kā hai khulā bāzār

phir apne shor kī qīmat samajh sakegā 'qaus'

na ḳhvāb dekh zarā jā Tahal ke aa bāzār

laga raha hun har ek dar pe aaina bazar

koi to dekhe sune dam bolta bazar

saja to KHub hai ab ke naya naya bazar

zamana jaan to le kya hai zaiqa bazar

parae jaan ki qimat faqat nazara nahin

KHudara band ho har din ka hadsa bazar

yahi to hota hai shishe ke karobar ka hashr

ujaD gaya hai achanak hara-bhara bazar

shab-e-siyah se KHaif hai yun meri diwar

saja ke baiThi hai aangan mein sham ka bazar

bas ek tabassum-e-dil se KHarid lije ise

jahan bhi jaiye is jaan ka hai khula bazar

phir apne shor ki qimat samajh sakega 'qaus'

na KHwab dekh zara ja Tahal ke aa bazar