lagaen aag hi dil mein ki kuchh ujala ho

lagā.eñ aag hī dil meñ ki kuchh ujālā ho

kisī bahāne to is ghar kā bol-bālā ho

numūd-e-sub.h ko kaise kare jahāñ taslīm

koī kiran ho kahīñ naam ko ujālā ho

na tum mile na ye duniyā-e-ġham hī raas aa.ī

tum hī batāo ki is ġham kā kyā izāla ho

ajab ajab sī haiñ afvāheñ garm zindāñ meñ

ajab nahīñ ki isī shab yahāñ ujālā ho

phir us kī baat kā kaise yaqīn aa jaa.e

vo jis kī baat kā andāz hī nirālā ho

kashāñ kashāñ hī chalo ye ravish hī behtar hai

kahīñ na zikr ho apnā na kuchh havāla ho

lagaen aag hi dil mein ki kuchh ujala ho

kisi bahane to is ghar ka bol-baala ho

numud-e-subh ko kaise kare jahan taslim

koi kiran ho kahin nam ko ujala ho

na tum mile na ye duniya-e-gham hi ras aai

tum hi batao ki is gham ka kya izala ho

ajab ajab si hain afwahen garm zindan mein

ajab nahin ki isi shab yahan ujala ho

phir us ki baat ka kaise yaqin aa jae

wo jis ki baat ka andaz hi nirala ho

kashan kashan hi chalo ye rawish hi behtar hai

kahin na zikr ho apna na kuchh hawala ho