lage wo bhulne phir aaj lafzon ki rawani mein

lage vo bhūlne phir aaj lafzoñ kī ravānī meñ

hamārā bhī to koī zikr thā un kī kahānī meñ

agar kartā hai yūñhī mehrbānī aap par koī

ġharaz koī chhupī hotī hai us kī mehrbānī meñ

hamāre shahr meñ jo āj-kal dahshat kā charchā hai

hai kis kā haath āḳhir is balā-e-nā-gahānī meñ

miTā detā hai zālim vaqt-e-āḳhir ḳhāl-o-ḳhad sab ke

huā karte haiñ sab hī ḳhūb-sūrat naujavānī meñ

girānī har tarah kī thī gavāra ab talak lekin

ḳhulūs-o-mehr bhī mahñge hue daur-e-girānī meñ

zabāñ hotī to shāyad aur bhī kyā kuchh na kah jaate

bahut kuchh kah ga.e duniyā se ham is be-zabānī meñ

khileñ jab phuul to ham kuuch kar jaa.eñ gulistāñ se

bhalā rakkhā hī kyā hai dahr kī is bāġhbānī meñ

mohabbat thī yā pāgal-pan nahīñ mā'lūm kuchh 'azrā'

luTā baiThe ham apnī jaañ tumhārī pāsbānī meñ

lage wo bhulne phir aaj lafzon ki rawani mein

hamara bhi to koi zikr tha un ki kahani mein

agar karta hai yunhi mehrbani aap par koi

gharaz koi chhupi hoti hai us ki mehrbani mein

hamare shahr mein jo aaj-kal dahshat ka charcha hai

hai kis ka hath aaKHir is bala-e-na-gahani mein

miTa deta hai zalim waqt-e-aKHir KHal-o-KHad sab ke

hua karte hain sab hi KHub-surat naujawani mein

girani har tarah ki thi gawara ab talak lekin

KHulus-o-mehr bhi mahnge hue daur-e-girani mein

zaban hoti to shayad aur bhi kya kuchh na kah jate

bahut kuchh kah gae duniya se hum is be-zabani mein

khilen jab phul to hum kuch kar jaen gulistan se

bhala rakkha hi kya hai dahr ki is baghbani mein

mohabbat thi ya pagal-pan nahin ma'lum kuchh 'azra'

luTa baiThe hum apni jaan tumhaari pasbani mein