لگے وہ بھولنے پھر آج لفظوں کی روانی میں

لگے وہ بھولنے پھر آج لفظوں کی روانی میں

ہمارا بھی تو کوئی ذکر تھا ان کی کہانی میں

اگر کرتا ہے یوںہی مہربانی آپ پر کوئی

غرض کوئی چھپی ہوتی ہے اس کی مہربانی میں

ہمارے شہر میں جو آج کل دہشت کا چرچا ہے

ہے کس کا ہاتھ آخر اس بلائے ناگہانی میں

مٹا دیتا ہے ظالم وقت آخر خال و خد سب کے

ہوا کرتے ہیں سب ہی خوبصورت نوجوانی میں

گرانی ہر طرح کی تھی گوارہ اب تلک لیکن

خلوص و مہر بھی مہنگے ہوئے دور گرانی میں

زباں ہوتی تو شاید اور بھی کیا کچھ نہ کہہ جاتے

بہت کچھ کہہ گئے دنیا سے ہم اس بے زبانی میں

کھلیں جب پھول تو ہم کوچ کر جائیں گلستاں سے

بھلا رکھا ہی کیا ہے دہر کی اس باغبانی میں

محبت تھی یا پاگل پن نہیں معلوم کچھ عذراؔ

لٹا بیٹھے ہم اپنی جاں تمہاری پاسبانی میں