lagi hai misi pan khae hue hain

lagī hai misī paan khaa.e hue haiñ

sunāne pe beḌā uThā.e hue haiñ

ġhazab hai hasīnoñ se dil kā lagānā

ye aafat ke putle banā.e hue haiñ

mire ḳhat ko phāḌā raqīboñ ke aage

kisī kī vo paTTī paḌhā.e hue haiñ

ulajhne se bāloñ ke bigḌo na sāhib

tumhāre hī ye sar chaḌhā.e hue haiñ

kaleja hathelī pe rakh luuñ to jā.ūñ

vo hāthoñ meñ mehñdī lagā.e hue haiñ

shab-e-hijr jab ḳhvāb dekhā ye dekhā

ki tujh ko gale se lagā.e hue haiñ

tirī teġh kī aab jaatī rahī hai

mire zaḳhm paanī churā.e hue haiñ

jidhar dekhtā huuñ unheñ kā hai jalva

vo nazroñ meñ aise samā.e hue haiñ

utāreñge kis kis ko nazroñ se 'anjum'

vo kyuuñ aaj tevarī chaḌhā.e hue haiñ

lagi hai misi pan khae hue hain

sunane pe beDa uThae hue hain

ghazab hai hasinon se dil ka lagana

ye aafat ke putle banae hue hain

mere KHat ko phaDa raqibon ke aage

kisi ki wo paTTi paDhae hue hain

ulajhne se baalon ke bigDo na sahib

tumhaare hi ye sar chaDhae hue hain

kaleja hatheli pe rakh lun to jaun

wo hathon mein mehndi lagae hue hain

shab-e-hijr jab KHwab dekha ye dekha

ki tujh ko gale se lagae hue hain

teri tegh ki aab jati rahi hai

mere zaKHm pani churae hue hain

jidhar dekhta hun unhen ka hai jalwa

wo nazron mein aise samae hue hain

utarenge kis kis ko nazron se 'anjum'

wo kyun aaj tewari chaDhae hue hain