lagta hai hamesha se isi kaam lage hain

lagtā hai hamesha se isī kaam lage haiñ

ye peḌ mashaqqat pe sar-e-ām lage haiñ

din-rāt munāsib nahīñ mahñgā.ī kā ronā

yūsuf se bahut saste mire daam lage haiñ

us sub.h ke hone meñ abhī raat paḌī hai

jis sub.h kī koshish meñ sar-e-shām lage haiñ

phal-phūl daraḳhtoñ pe khilā karte haiñ jaise

us tarah mire ranj ko ālām lage haiñ

ik baar mujhe phir ye safā.ī nahīñ denī

pahle bhī ka.ī baar ye ilzām lage haiñ

kyā taisha-e-farhād hai kyā dasht-navardī

ye puḳhta irāde to sabhī ḳhaam lage haiñ

hoñToñ pe abhī tak haiñ tire hoñToñ kī mohreñ

ham haiñ ki hamesha se tire naam lage haiñ

ye nāma-e-a.amāl zarā der muaḳhḳhar

thak-hār ke karne abhī ārām lage haiñ

kam-zarf se 'mas.ūd' bhalā.ī kī tavaqqo

kīkar ke daraḳhtoñ pe kabhī aam lage haiñ

lagta hai hamesha se isi kaam lage hain

ye peD mashaqqat pe sar-e-am lage hain

din-raat munasib nahin mahngai ka rona

yusuf se bahut saste mere dam lage hain

us subh ke hone mein abhi raat paDi hai

jis subh ki koshish mein sar-e-sham lage hain

phal-phul daraKHton pe khila karte hain jaise

us tarah mere ranj ko aalam lage hain

ek bar mujhe phir ye safai nahin deni

pahle bhi kai bar ye ilzam lage hain

kya taisha-e-farhad hai kya dasht-nawardi

ye puKHta irade to sabhi KHam lage hain

honTon pe abhi tak hain tere honTon ki mohren

hum hain ki hamesha se tere nam lage hain

ye nama-e-amal zara der muaKHKHar

thak-haar ke karne abhi aaram lage hain

kam-zarf se 'masud' bhalai ki tawaqqo

kikar ke daraKHton pe kabhi aam lage hain