laghzish se rahnumaon ki jab hum sanbhal gae

laġhzish se rahnumāoñ kī jab ham sañbhal ga.e

manzil qarīb aa.ī to raste badal ga.e

har rāh-rau se terā pata pūchhte hue

ham rāh-e-dair-o-ka.aba se aage nikal ga.e

phūTī hai jab bhī tere tabassum kī ik kiran

ghabrā ke ḳhud-baḳhud hī añdhere pighal ga.e

rindān-e-tishna-kām ko ab mai se kyā ġharaz

saaqī kī chashm-e-mast se jab daur chal ga.e

ab bhī jabīn-e-zīst pe fāqoñ kī hai shikan

maanā ki zindagī ke taqāze badal ga.e

un ke nuqūsh-e-pā kā ye e.ajāz dekhiye

zarre mah-o-nujūm ke sāñche meñ Dhal ga.e

jab bhī nikhar gayā mire sheroñ kā bāñkpan

ai dost fikr-o-fan ke ka.ī diip jal ga.e

aisī chalīñ havā.eñ havādis kī ai 'nishāt'

afsāna-e-hayāt ke unvāñ badal ga.e

laghzish se rahnumaon ki jab hum sanbhal gae

manzil qarib aai to raste badal gae

har rah-rau se tera pata puchhte hue

hum rah-e-dair-o-kaba se aage nikal gae

phuTi hai jab bhi tere tabassum ki ek kiran

ghabra ke KHud-baKHud hi andhere pighal gae

rindan-e-tishna-kaam ko ab mai se kya gharaz

saqi ki chashm-e-mast se jab daur chal gae

ab bhi jabin-e-zist pe faqon ki hai shikan

mana ki zindagi ke taqaze badal gae

un ke nuqush-e-pa ka ye eajaz dekhiye

zarre mah-o-nujum ke sanche mein Dhal gae

jab bhi nikhar gaya mere sheron ka bankpan

ai dost fikr-o-fan ke kai dip jal gae

aisi chalin hawaen hawadis ki ai 'nishat'

afsana-e-hayat ke unwan badal gae