lahad aur hashr mein ye farq kam pae nahin jate

lahad aur hashr meñ ye farq kam paa.e nahīñ jaate

yahāñ dhuup aa nahīñ saktī vahāñ saa.e nahīñ jaate

kisī mahfil meñ bhī aise chalan paa.e nahīñ jaate

ki bulvā.e hue mehmān uThvā.e nahīñ jaate

zamīñ par pā.ūñ rakhne de unheñ ai nāz-e-yaktā.ī

ki ab naqsh-e-qadam un ke kahīñ paa.e nahīñ jaate

tujhe ai dīda-e-tar fikr kyuuñ hai dil ke zaḳhmoñ kī

ki be-shabnam ke bhī ye phuul murjhā.e nahīñ jaate

junūñ vāloñ ko kyā samjhāoge ye vo zamāna hai

ḳhirad vaale ḳhirad vāloñ se samjhā.e nahīñ jaate

vaqār-e-ishq yuuñ bhī sham.a kī nazroñ meñ kuchh kam hai

patiñge ḳhud chale aate haiñ bulvā.e nahīñ jaate

fazīlat hai ye insāñ kī vahāñ tak jā pahuñchtā hai

farishte kyā farishtoñ ke jahāñ saa.e nahīñ jaate

bas itnī baat par chhīnī ga.ī hai rahbarī ham se

ki ham se kārvāñ manzil pe luTvā.e nahīñ jaate

'qamar' kī sub.h-e-furqat pūchhiye sūraj kī kirnoñ se

sitāre to gavāhī ke liye aa.e nahīñ jaate

lahad aur hashr mein ye farq kam pae nahin jate

yahan dhup aa nahin sakti wahan sae nahin jate

kisi mahfil mein bhi aise chalan pae nahin jate

ki bulwae hue mehman uThwae nahin jate

zamin par paun rakhne de unhen ai naz-e-yaktai

ki ab naqsh-e-qadam un ke kahin pae nahin jate

tujhe ai dida-e-tar fikr kyun hai dil ke zaKHmon ki

ki be-shabnam ke bhi ye phul murjhae nahin jate

junun walon ko kya samjhaoge ye wo zamana hai

KHirad wale KHirad walon se samjhae nahin jate

waqar-e-ishq yun bhi shama ki nazron mein kuchh kam hai

patinge KHud chale aate hain bulwae nahin jate

fazilat hai ye insan ki wahan tak ja pahunchta hai

farishte kya farishton ke jahan sae nahin jate

bas itni baat par chhini gai hai rahbari hum se

ki hum se karwan manzil pe luTwae nahin jate

'qamar' ki subh-e-furqat puchhiye suraj ki kirnon se

sitare to gawahi ke liye aae nahin jate