lahakti lahron mein jaan hai kinare zinda hain

lahaktī lahroñ meñ jaañ hai kināre zinda haiñ

vajūd-e-āb ke sab isti.āre zinda haiñ

vo hijratoñ kī hikāyat tumheñ sunā.eñge

jinhoñ ne sar se ye tūfāñ guzāre zinda haiñ

hamāre karb kitāboñ meñ haiñ abhī mahfūz

vo saare safhe vo sab goshvāre zinda haiñ

azal se jabr o sadāqat kī jañg jaarī hai

abhī talak nahīñ mazlūm haare zinda haiñ

majālis-e-sitam-ījād kā nishān nahīñ

mohabbatoñ ke abhī tak idāre zinda haiñ

jo tere ġham meñ jale haiñ vo phir bujhe hī nahīñ

jab in kī raakh kuredo sharāre zinda haiñ

abhī tumhāre taḌapne ke din nahīñ aa.e

abhī to ḳhair se ḳhādim tumhāre zinda haiñ

ham apne jiine kā ab kyā javāz pesh kareñ

ki ab na ham na zamāne hamāre zinda haiñ

har ek shaḳhs ko is baat kā shu.ūr nahīñ

jo 'rām' haq pe mare haiñ vo saare zinda haiñ

lahakti lahron mein jaan hai kinare zinda hain

wajud-e-ab ke sab istiare zinda hain

wo hijraton ki hikayat tumhein sunaenge

jinhon ne sar se ye tufan guzare zinda hain

hamare karb kitabon mein hain abhi mahfuz

wo sare safhe wo sab goshware zinda hain

azal se jabr o sadaqat ki jang jari hai

abhi talak nahin mazlum haare zinda hain

majalis-e-sitam-ijad ka nishan nahin

mohabbaton ke abhi tak idare zinda hain

jo tere gham mein jale hain wo phir bujhe hi nahin

jab in ki rakh kuredo sharare zinda hain

abhi tumhaare taDapne ke din nahin aae

abhi to KHair se KHadim tumhaare zinda hain

hum apne jine ka ab kya jawaz pesh karen

ki ab na hum na zamane hamare zinda hain

har ek shaKHs ko is baat ka shuur nahin

jo 'ram' haq pe mare hain wo sare zinda hain