lahar ne jab bikharte waqt muD ke pul ko dekha tha

lahar ne jab bikharte vaqt muḌ ke pul ko dekhā thā

nadī ke bahte paanī par kisī kā naam likkhā thā

usī sūkhe shajar ke nīche terī raah taktā huuñ

bichhaḌte vaqt tū jis se lipaT ke ḳhuub royā thā

anokhā shaḳhs thā us se milāyā haath jab maiñ ne

lagā jaise ki us kī uñgliyoñ meñ dil dhaḌaktā thā

galī ke ek ghar meñ kāñch kī aisī bhī khiḌkī thī

sub.h hotī thī jis ke khulne pe sūraj nikaltā thā

kisī kī badduā kā hai asar ab uḌ nahīñ saktā

nahīñ to ye parinda āsmāñ se baat kartā thā

sajā.e apne pairoñ par mahāvar shaam baiThī thī

tasavvur meñ kisī kī yaad kā din Dhalne vaalā thā

purānī mez kī kholī darāzeñ to hañsī aa.ī

kisī ke pyaar meñ ham ne chhupā ke kyā kyā rakkhā thā

use is baat kā ehsās ab bhī sāltā hogā

agar maiñ chāhtā us ko harā kar jiit saktā thā

lahar ne jab bikharte waqt muD ke pul ko dekha tha

nadi ke bahte pani par kisi ka nam likkha tha

usi sukhe shajar ke niche teri rah takta hun

bichhaDte waqt tu jis se lipaT ke KHub roya tha

anokha shaKHs tha us se milaya hath jab main ne

laga jaise ki us ki ungliyon mein dil dhaDakta tha

gali ke ek ghar mein kanch ki aisi bhi khiDki thi

subh hoti thi jis ke khulne pe suraj nikalta tha

kisi ki baddua ka hai asar ab uD nahin sakta

nahin to ye parinda aasman se baat karta tha

sajae apne pairon par mahawar sham baiThi thi

tasawwur mein kisi ki yaad ka din Dhalne wala tha

purani mez ki kholi daraazen to hansi aai

kisi ke pyar mein hum ne chhupa ke kya kya rakkha tha

use is baat ka ehsas ab bhi salta hoga

agar main chahta us ko hara kar jit sakta tha