lahja badal ke tujhse na ki guftugu kabhi

lahja badal ke tujh se na kī guftugū kabhī

lekin ye kyā ki khul na sakā mujh pe tū kabhī

baḌhte haiñ tajrabāt bhī umr-e-ravāñ ke saath

ghaTtā nahīñ hai dā.era-e-justujū kabhī

ab be-niyāz-e-rasm-e-jahāñ ho gayā huuñ maiñ

thā āshnā-e-lazzat-e-jām-o-subū kabhī

ahd-e-bahār ho ki ḳhizāñ kā hisār ho

hotā nahīñ hai band dar-e-ārzū kabhī

jis ne mujhe shu.ūr-e-ġham-e-mo'atabar diyā

'aḳhtar' vo shaḳhs aa na sakā rū-ba-rū kabhī

lahja badal ke tujh se na ki guftugu kabhi

lekin ye kya ki khul na saka mujh pe tu kabhi

baDhte hain tajrabaat bhi umr-e-rawan ke sath

ghaTta nahin hai daera-e-justuju kabhi

ab be-niyaz-e-rasm-e-jahan ho gaya hun main

tha aashna-e-lazzat-e-jam-o-subu kabhi

ahd-e-bahaar ho ki KHizan ka hisar ho

hota nahin hai band dar-e-arzu kabhi

jis ne mujhe shuur-e-gham-e-mo'atabar diya

'aKHtar' wo shaKHs aa na saka ru-ba-ru kabhi