lahr pe bante bigaDte habab ki surat

lahr pe bante bigaḌte habāb kī sūrat

hameñ jo niiñd bhī aa.ī to ḳhvāb kī sūrat

yahīñ pe ek musavvir ne jaan de dī thī

banī na ret pe jab us se aab kī sūrat

ye haath likhne lage ishq be-ḳhayālī meñ

baġhaur tujh ko paḌhā jab kitāb kī sūrat

sajā.e phirte haiñ tamġhe kī tarah siine pe

ye ishq jiitā hai ham ne ḳhitāb kī sūrat

ye jin ragoñ meñ junūñ dauḌtā hai ḳhuuñ ban kar

unhīñ ne bāñdhā hai dil ko tanāb kī sūrat

lahr pe bante bigaDte habab ki surat

hamein jo nind bhi aai to KHwab ki surat

yahin pe ek musawwir ne jaan de di thi

bani na ret pe jab us se aab ki surat

ye hath likhne lage ishq be-KHayali mein

baghaur tujh ko paDha jab kitab ki surat

sajae phirte hain tamghe ki tarah sine pe

ye ishq jita hai hum ne KHitab ki surat

ye jin ragon mein junun dauDta hai KHun ban kar

unhin ne bandha hai dil ko tanab ki surat