lahr TuTi hai ki aaina-e-mahtab mein hum

lahr TuuTī hai ki ā.ina-e-mahtāb meñ ham

chāñd chamkā to paḌe rah ga.e tālāb meñ ham

qaus ke rang churā lā.eñge aur ā.eñge

pairahan bunñe ko fursat se tire ḳhvāb meñ ham

koī be-nām havā fasl-e-badan kyuuñ kaaTe

lahlahāte nahīñ har ḳhitta-e-shādāb meñ ham

sāhiloñ par khaḌe logoñ kī nazar se dekho

ek kashtī meñ haiñ aur ek hī girdāb meñ ham

gaañv ke ūñche daraḳhtoñ ko bhalā kyā mālūm

shahr aa.e haiñ jaḌeñ kaaT ke sailāb meñ ham

ghar se ḳhushbū ke ta.āqub meñ nikal kar 'tālib'

roz aa jaate haiñ ik halqa-e-ahbāb meñ ham

lahr TuTi hai ki aaina-e-mahtab mein hum

chand chamka to paDe rah gae talab mein hum

qaus ke rang chura laenge aur aaenge

pairahan bunne ko fursat se tere KHwab mein hum

koi be-nam hawa fasl-e-badan kyun kaTe

lahlahate nahin har KHitta-e-shadab mein hum

sahilon par khaDe logon ki nazar se dekho

ek kashti mein hain aur ek hi girdab mein hum

ganw ke unche daraKHton ko bhala kya malum

shahr aae hain jaDen kaT ke sailab mein hum

ghar se KHushbu ke taaqub mein nikal kar 'talib'

roz aa jate hain ek halqa-e-ahbab mein hum