lahr us aankh mein lahrai jo be-zari ki

lahr us aañkh meñ lahrā.ī jo be-zārī kī

ham ne hañste hue phir kuuch kī tayyārī kī

mujh ko jis raat samundar ne utārā ḳhud meñ

maiñ ne us raat bhī sāhil kī taraf-dārī kī

ham ne girye ko bhī ādāb ke andar rakkhā

apne a.asāb pe vahshat na kabhī taarī kī

naqsh-e-pā DhūñDhtā phirtā hai sahar kā vo bhī

jis pe ik raat bhī guzrī nahīñ bedārī kī

raushnī parda-e-mizgāñ se chhinī jaatī hai

kis ne ye ḳhvāb-gah-e-dil meñ ziyā-bārī kī

dil meñ bhar laayā huuñ mahrūmī-e-duniyā 'sajjād'

aaj bāzār se phir maiñ ne ḳharīdārī kī

lahr us aankh mein lahrai jo be-zari ki

hum ne hanste hue phir kuch ki tayyari ki

mujh ko jis raat samundar ne utara KHud mein

main ne us raat bhi sahil ki taraf-dari ki

hum ne girye ko bhi aadab ke andar rakkha

apne aasab pe wahshat na kabhi tari ki

naqsh-e-pa DhunDhta phirta hai sahar ka wo bhi

jis pe ek raat bhi guzri nahin bedari ki

raushni parda-e-mizgan se chhini jati hai

kis ne ye KHwab-gah-e-dil mein ziya-bari ki

dil mein bhar laya hun mahrumi-e-duniya 'sajjad'

aaj bazar se phir main ne KHaridari ki