lahra rahe hain shaKHon pe parcham bahaar ke

lahrā rahe haiñ shāḳhoñ pe parcham bahār ke

rakkhe haiñ titliyoñ ne abhī ġham utaar ke

ḳhvāboñ ke phuul palkoñ kī dahlīz par na rakh

murjhā na jaa.eñ dhuup meñ mausam vaqār ke

har pal haiñ zindagī ke taqāze na.e na.e

lagne lage haiñ ḳhud ko bhī ab ham udhār ke

bastī meñ aaj bhī mirī chūlhe nahīñ jale

zinda hai phir bhī sub.h shab-e-ġham guzār ke

gum ho gayā hai ajnabī chehroñ meñ apnā-pan

ḳhāmosh ho ga.e mujhe mahram pukār ke

zaḳhmoñ kī ḳhushk kyāriyāñ shādāb ho ga.iiñ

kitne karam haiñ mujh pe mire ġham-gusār ke

bechainī be-qarārī hameñ raas aa ga.ī

lamhe the zindagī meñ bahut kam qarār ke

lahra rahe hain shaKHon pe parcham bahaar ke

rakkhe hain titliyon ne abhi gham utar ke

KHwabon ke phul palkon ki dahliz par na rakh

murjha na jaen dhup mein mausam waqar ke

har pal hain zindagi ke taqaze nae nae

lagne lage hain KHud ko bhi ab hum udhaar ke

basti mein aaj bhi meri chulhe nahin jale

zinda hai phir bhi subh shab-e-gham guzar ke

gum ho gaya hai ajnabi chehron mein apna-pan

KHamosh ho gae mujhe mahram pukar ke

zaKHmon ki KHushk kyariyan shadab ho gain

kitne karam hain mujh pe mere gham-gusar ke

bechaini be-qarari hamein ras aa gai

lamhe the zindagi mein bahut kam qarar ke