lahu aankhon mein raushan hai ye manzar dekhna ab ke

lahū āñkhoñ meñ raushan hai ye manzar dekhnā ab ke

dayār-e-ġham meñ kyā guzrī hai ham par dekhnā ab ke

añdherā hai vahī lekin rivāyat vo nahīñ baaqī

charāġhoñ kī jagah hāthoñ meñ ḳhanjar dekhnā ab ke

sulagte ghar kī chingārī bhī badla lene vaalī hai

ye manzar dekhnā lekin sambhal kar dekhnā ab ke

shikast-o-fat.h kī tārīḳh likkhī jā.egī yuuñ bhī

tahī-dastī se hogā mā'rka sar dekhnā ab ke

shanāsā.ī ke saa.e baḌh ga.e sahn-e-rifāqat meñ

hamārī pusht meñ paivast ḳhanjar dekhnā ab ke

zamīñ ko phir lahū baḳhshā gayā hai be-gunāhoñ kā

sitam ke har shajar ko phir samar-var dekhnā ab ke

sukūt-e-shab meñ āñkheñ band hoñgī jab darīchoñ kī

koī saaya nazar aa.egā dar dar dekhnā ab ke

chhalakne vaalī hai ye chashm-e-vīrāñ ek din 'rāhī'

sulagte dasht meñ koī samundar dekhnā ab ke

lahu aankhon mein raushan hai ye manzar dekhna ab ke

dayar-e-gham mein kya guzri hai hum par dekhna ab ke

andhera hai wahi lekin riwayat wo nahin baqi

charaghon ki jagah hathon mein KHanjar dekhna ab ke

sulagte ghar ki chingari bhi badla lene wali hai

ye manzar dekhna lekin sambhal kar dekhna ab ke

shikast-o-fath ki tariKH likkhi jaegi yun bhi

tahi-dasti se hoga ma'rka sar dekhna ab ke

shanasai ke sae baDh gae sahn-e-rifaqat mein

hamari pusht mein paiwast KHanjar dekhna ab ke

zamin ko phir lahu baKHsha gaya hai be-gunahon ka

sitam ke har shajar ko phir samar-war dekhna ab ke

sukut-e-shab mein aankhen band hongi jab darichon ki

koi saya nazar aaega dar dar dekhna ab ke

chhalakne wali hai ye chashm-e-viran ek din 'rahi'

sulagte dasht mein koi samundar dekhna ab ke