lahu ba-rang-e-digar husn-e-lala-zar mein hai

lahū ba-rang-e-digar husn-e-lāla-zār meñ hai

ye dukh ḳhizāñ meñ kahāñ thā jo ab bahār meñ hai

jo ḳhushk hone lagā hai to taaza kar degā

ki zaḳhm zaḳhm mirā sab nigāh-e-yār meñ hai

maiñ bhuul kar bhī nahīñ bhuul pā rahā huuñ jise

vo ek naam jo ab bhī dil-e-figār meñ hai

Dhalegā shaam ko sūraj to haal pūchhūñgā

abhī zamāna hai us kā vo eqtidār meñ hai

diloñ meñ zinda hai gar jazba-e-barāhīmī

na ḳhauf kar ki tū namrūd jaisī naar meñ hai

zamīn khod ke katba vo likh rahā hai ki ab

nayā sā koī safar aur intizār meñ hai

muqaddaroñ ko sitāroñ meñ qaid kar ke na rakh

bhalā burā to tire dast-e-iḳhtiyār meñ hai

ab āsmāñ kī bulandī ko uñgliyāñ na dikhā

tujhe ḳhabar hai zamīñ is ke hī hisār meñ hai

ḳhulūs-e-dil se pukāro to vo sunegā zarūr

ġhurūr meñ kahāñ baḳhshish jo inkisār meñ hai

ye shā.irī kā hunar tū ne hī to baḳhshā hai

suḳhanvarī ye kahāñ mere iḳhtiyār meñ hai

vo dil hī kyā ki 'zafar' jo ġhamoñ se aarī ho

kahāñ vo lutf jo soz-e-dil-e-figār meñ hai

lahu ba-rang-e-digar husn-e-lala-zar mein hai

ye dukh KHizan mein kahan tha jo ab bahaar mein hai

jo KHushk hone laga hai to taza kar dega

ki zaKHm zaKHm mera sab nigah-e-yar mein hai

main bhul kar bhi nahin bhul pa raha hun jise

wo ek nam jo ab bhi dil-e-figar mein hai

Dhalega sham ko suraj to haal puchhunga

abhi zamana hai us ka wo eqtidar mein hai

dilon mein zinda hai gar jazba-e-barahimi

na KHauf kar ki tu namrud jaisi nar mein hai

zamin khod ke katba wo likh raha hai ki ab

naya sa koi safar aur intizar mein hai

muqaddaron ko sitaron mein qaid kar ke na rakh

bhala bura to tere dast-e-iKHtiyar mein hai

ab aasman ki bulandi ko ungliyan na dikha

tujhe KHabar hai zamin is ke hi hisar mein hai

KHulus-e-dil se pukaro to wo sunega zarur

ghurur mein kahan baKHshish jo inkisar mein hai

ye shairi ka hunar tu ne hi to baKHsha hai

suKHanwari ye kahan mere iKHtiyar mein hai

wo dil hi kya ki 'zafar' jo ghamon se aari ho

kahan wo lutf jo soz-e-dil-e-figar mein hai