lahu fashan hain waraq aur dil tapida hain

lahū fashāñ haiñ varaq aur dil tapīda haiñ

adīb-e-shahr ke ab bhī qalam burīda haiñ

na izn-e-āh-o-fuġhāñ hai ki nauha-e-hastī

kise sunā.eñ jo alfāz ḳhūñ-chakīdā haiñ

kabhī zabāneñ nikal aa.iiñ ḳhārzāroñ kī

shajar chaman ke ḳhamoshī se sar-ḳhamīda haiñ

nahīñ muaaf mere ghar meñ jurm-e-haq-goī

sañbhal ke dekh shahar meñ jo sar-kashīda haiñ

bas itnā soch ke ḳhud ko sambhāl lete haiñ

jahāñ meñ ham se bhī baḌh kar sitam-rasīda haiñ

tumhāre milne se pahle na thā koī maz.hab

bichhaḌ ke tum se magar aaj bā-aqīda haiñ

hamāre vāste dāmān-e-dostāñ tañg hai

hameñ salām karo ham vafā-gazīda haiñ

abhī to ġham ke shajar pe khilī haiñ kuchh kaliyāñ

abhī to palkoñ pe kuchh taare nau-damīda haiñ

ye kaisā daur hai 'zebā' ki ashk tak chup haiñ

sajā laboñ pe tabassum hai dil kabīda haiñ

lahu fashan hain waraq aur dil tapida hain

adib-e-shahr ke ab bhi qalam burida hain

na izn-e-ah-o-fughan hai ki nauha-e-hasti

kise sunaen jo alfaz KHun-chakida hain

kabhi zabanen nikal aain KHarzaron ki

shajar chaman ke KHamoshi se sar-KHamida hain

nahin muaf mere ghar mein jurm-e-haq-goi

sanbhal ke dekh shahar mein jo sar-kashida hain

bas itna soch ke KHud ko sambhaal lete hain

jahan mein hum se bhi baDh kar sitam-rasida hain

tumhaare milne se pahle na tha koi mazhab

bichhaD ke tum se magar aaj ba-aqida hain

hamare waste daman-e-dostan tang hai

hamein salam karo hum wafa-gazida hain

abhi to gham ke shajar pe khili hain kuchh kaliyan

abhi to palkon pe kuchh tare nau-damida hain

ye kaisa daur hai 'zeba' ki ashk tak chup hain

saja labon pe tabassum hai dil kabida hain