lahu ki aag mein dil ka samundar Dub jaega

lahū kī aag meñ dil kā samundar Duub jā.egā

badan ke raaz apne saath le kar Duub jā.egā

uḌegā bādbāñ ban kar mohabbat se bharā ye dil

talab se ho gayā ḳhālī to patthar Duub jā.egā

ye dil sairāb halkī bārishoñ meñ ho to ho varna

achānak lahr meñ banjar kā banjar Duub jā.egā

tamāshā dekhne vāloñ ko kyā ma.alūm āḳhir meñ

baraste qahqahoñ ke baad joker Duub jā.egā

karegā TuuT ke jo kā.enātī raqs gardish meñ

ḳhud apnī mauj meñ man kā qalandar Duub jā.egā

bhale tairāk ho kaisā use thaknā to hai āḳhir

guzarte vaqt kī tah meñ sikandar Duub jā.egā

gumāñ us ko hai merā hī makāñ kachchā hai bastī meñ

yaqīñ mujh ko mire ham-sāya kā ghar Duub jā.egā

abhī paanī se bāhar hai zarā sī Dūbtī kashtī

faqat do-chār lamhoñ meñ ye manzar Duub jā.egā

hamāre vāste kholī ga.ī hai raah paanī meñ

hamāre baad aa.egā jo lashkar Duub jā.egā

safar meñ hai to bahte pāniyoñ kī mauj kā sāthī

kināre par pahuñch ke dil kā langar Duub jā.egā

hamāre dekhte hī dekhte ubhre nuqūsh-e-sub.h

hamāre sāmne sūraj kā paikar Duub jā.egā

hameñ le jā.egā TuuTā huā taḳhta kināre par

magar sāmān sab kashtī ke andar Duub jā.egā

lahu ki aag mein dil ka samundar Dub jaega

badan ke raaz apne sath le kar Dub jaega

uDega baadban ban kar mohabbat se bhara ye dil

talab se ho gaya KHali to patthar Dub jaega

ye dil sairab halki barishon mein ho to ho warna

achanak lahr mein banjar ka banjar Dub jaega

tamasha dekhne walon ko kya malum aaKHir mein

baraste qahqahon ke baad joker Dub jaega

karega TuT ke jo kaenati raqs gardish mein

KHud apni mauj mein man ka qalandar Dub jaega

bhale tairak ho kaisa use thakna to hai aaKHir

guzarte waqt ki tah mein sikandar Dub jaega

guman us ko hai mera hi makan kachcha hai basti mein

yaqin mujh ko mere ham-saya ka ghar Dub jaega

abhi pani se bahar hai zara si Dubti kashti

faqat do-chaar lamhon mein ye manzar Dub jaega

hamare waste kholi gai hai rah pani mein

hamare baad aaega jo lashkar Dub jaega

safar mein hai to bahte paniyon ki mauj ka sathi

kinare par pahunch ke dil ka langar Dub jaega

hamare dekhte hi dekhte ubhre nuqush-e-subh

hamare samne suraj ka paikar Dub jaega

hamein le jaega TuTa hua taKHta kinare par

magar saman sab kashti ke andar Dub jaega