lahu ki mai banai dil ka paimana bana Dala

lahū kī mai banā.ī dil kā paimāna banā Daalā

jigar-dāroñ ne maqtal ko bhī mai-ḳhāna banā Daalā

hamāre jazba-e-tāmīr kī kuchh daad do yaaro

ki ham ne bijliyoñ ko sham.a kā shāna banā Daalā

sitam Dhāte ho lekin lutf kā ehsās hotā hai

isī andāz ne duniyā ko dīvāna banā Daalā

bharī mahfil meñ ham ne baat kar lī thī un āñkhoñ se

bas itnī baat kā yāroñ ne afsāna banā Daalā

mire zauq-e-parastish kī karishma-sāziyāñ dekho

kabhī ka.aba kabhī ka.abe ko but-ḳhāna banā Daalā

shikāyat bijliyoñ se hai na shikva bād-e-sarsar se

chaman ko ḳhud chaman vāloñ ne vīrāna banā Daalā

chalo achchhā huā duniyā 'hafīz' ab duur hai ham se

mohabbat ne hameñ duniyā se begāna banā Daalā

lahu ki mai banai dil ka paimana bana Dala

jigar-daron ne maqtal ko bhi mai-KHana bana Dala

hamare jazba-e-tamir ki kuchh dad do yaro

ki hum ne bijliyon ko shama ka shana bana Dala

sitam Dhate ho lekin lutf ka ehsas hota hai

isi andaz ne duniya ko diwana bana Dala

bhari mahfil mein hum ne baat kar li thi un aankhon se

bas itni baat ka yaron ne afsana bana Dala

mere zauq-e-parastish ki karishma-saziyan dekho

kabhi kaba kabhi kabe ko but-KHana bana Dala

shikayat bijliyon se hai na shikwa baad-e-sarsar se

chaman ko KHud chaman walon ne virana bana Dala

chalo achchha hua duniya 'hafiz' ab dur hai hum se

mohabbat ne hamein duniya se begana bana Dala